Wat jou hande oor jou gesondheid verklap

Jou hande is meer as net jou daaglikse gereedskap; hulle verklap waardevolle inligting oor jou gesondheid. Kom ons kyk na wat jou hande oor jou algemene welstand sê en watter gesondheidsgevare in naelprodukte kan skuil. Ons gee ook wenke om jou hande gesond en mooi te hou.

Wat sê jou hande oor jou gesondheid?

Jou hande kan op verskeie maniere vir jou aanduidings gee van moontlike gesondheidskwale. Let veral op die volgende:

Kleur en tekstuur van jou naels

• Bleek of wit naels kan dui op bloedarmoede of lewersiekte.
• Geel naels is dalk ʼn teken van swaminfeksie of respiratoriese probleme.
• Groefies of riffels in die naels wys moontlik op psoriase of inflammatoriese artritis.

Toestand van jou vel

• Droë, gekraakte vel kan dalk ekseem of skildklierprobleme wees.
• Rooi, geswolle vel is dalk ʼn aanduiding van ʼn allergiese reaksie of infeksie.

Krag en koördinasie van jou hande

• ʼn Swak greep is dalk ʼn vroeë teken van artritis of karpale tonnelsindroom.
• Bewerasies hou moontlik verband met neurologiese probleme soos Parkinson se siekte.

Die gevare van naellak en -verwyderaar

Manikure en pedikure is ʼn lekker manier om jou selfvertroue ʼn hupstoot te gee. Maar sekere produkte in hierdie behandelings is moontlik gevaarlik. Hier’s wat jy moet weet.

Naellak

• Sekere naelpolitoere bevat formaldehied, tolueen en dibutielftalaat wat allergiese reaksies, asemhalingsprobleme en selfs endokriene-ontwrigting kan veroorsaak.
• Wees versigtig vir dié en ander gifstowwe, veral wanneer naellak nie ʼn lys van al die bestanddele op het nie. Kies eerder handelsmerke wat openlik is oor hulle formulerings.

Naellakverwyderaars

• Asetoon is ʼn algemene bestanddeel in naellakverwyderaar. Dit is doeltreffend, maar dit maak egter die naels en vel droog en bros.
• Verwyderaars sonder asetoon is sagter op die vel, maar bevat dikwels ander chemikalieë wat steeds velirritasies of allergiese reaksies kan veroorsaak.
• Onlangse navorsing het bevind dat polifluroalkielsubstante (PFAS) in baie kosmetiese produkte, insluitende verwyderaar, voorkom. PFAS is gekoppel aan talle gesondheidskwessies, insluitend kanker en voortplantingsprobleme.

Beskerm jouself teen skadelike stowwe

Vir ʼn gesonde, veilige handsorgroetine, maak seker jy:

Kies jou produkte versigtig

• Soek vir naellak en -verwyderaar wat sê “3-free”, “5-free” of “7-free”. Dit dui dat die naelpolitoer nie sekere van die gevaarlikste chemikalieë bevat nie.
• Vermy produkte met ongeïdentifiseerde geurmiddels wat skadelike stowwe kan verdoesel.

Verseker voldoende ventilasie

• Wanneer jy met naellak en -verwyderaar werk, verseker dat daar genoegsame ventilasie is sodat jy so min as moontlik walms inasem.

Onthou dat natuurlik nie altyd beter is nie

• Sommige natuurlike produkte bevat hoë hoeveelhede plantekstrakte wat allergiese reaksies kan veroorsaak. Bestudeer altyd die lys van bestanddele.

Wenke vir gesonde hande

Dit hoef nie ʼn gesukkel te wees om jou hande gesond en mooi te hou nie. Hier is ʼn paar eenvoudige, doeltreffende wenke.

• Bevogtig gereeld jou hande: Gebruik handeroom met bestanddele soos aalwyn, klapperolie, galambotter, vitamien E en gliserien.
• Beskerm jou hande: Dra handskoene wanneer jy huiswerk doen of met sterk chemikalieë werk.
• Hidreer: Drink baie water sodat jou vel van binne af buitentoe kan bevogtig.
• Gaan vir gereelde ondersoeke: Let op enige veranderinge en gesels met ʼn gesondheidsorgpraktisyn as jy enige kommerwekkende simptome opmerk.

Wanneer jy bedag is oor die produkte wat jy gebruik en mooi na jou hande omsien, kan jy pragtige hande hê en risiko’s vermy. Onthou, jou hande vertel ʼn storie van jou gesondheid. Maak seker dis ʼn goeie een!